Trátase dun curso de galego deseñado para responder ás necesidades específicas do uso do idioma no ámbito do comercio local. Este curso daralle prioridade á competencia oral do galego, pero tamén ofrecerá formación na competencia comunicativa escrita para facilitar o seu uso no contorno dixital das relacións do negocio.

O curso comezará cunha charla informativa sobre a produtividade real e beneficios económicos do uso do galego no comercio local, tanto a nivel oral como a nivel escrito, facendo tamén fincapé no uso do galego na visibilización da empresa no contorno dixital.

Dada a previsible diversidade do grupo, o curso adaptarase ás necesidades reais do alumnado. Prevese a existencia de dous perfís: 

• Un galegofalante que se sente inseguro no uso do idioma no contorno laboral e comercial de atención ao cliente, e que precisaría dunha metodoloxía didáctica destinada a ofrecerlle seguridade no uso do idioma tanto na escrita como no emprego de terminoloxía axeitada á comunicación oral no comercio.

• O segundo grupo estaría formado por non galegofalantes que precisa un seguimento máis intenso no proceso de adquisición das competencias comunicativas a nivel escrito e oral e unha maior práctica das situacións de comunicación.

As sesións terán unha duración de 60 minutos e celebraranse unha vez por semana en horario matinal atendendo á dispoñibilidade do grupo, que terá un máximo de dez alumnos. Os alumnos poderán recibir tarefas individuais de reforzo.