Hotel Santiago Apóstol en Santiago

A Asociación Pro-Fundación Manoel Vello celebra a súa primeira xornada sobre o uso do galego nos contornos dixital, laboral e radiofónico coa que convida aos asistentes a reflexionar sobre as necesidades de actuación por parte do mundo asociativo de cara a garantir a presenza do noso idioma nestes ámbitos da sociedade galega.

Se ben se trata dunha xornada aberta a toda a cidadanía, está especialmente destinada a inspirar o deseño de proxectos a elaborar por parte da Asociación Pro-Fundación Manoel Vello, para o que as aportacións do público será mesmamente moi estimada.

A xornada comezará cunha charla sobre o galego nos medios dixitais, continuará cunha mesa redonda sobre o uso do galego como idioma vehicular dentro da empresa, e rematará cunha mesa-charla sobre a actual oferta radiofónica en galego e os seus retos para consolidarse como referente da mocidade.